ឧត្តរមានជ័យ៖ កុមារចំនួន១នាក់បានស្លាប់ និង២នាក់ទៀតរងរបួសធ្ងន់ធ្ងរ ដោយសារយកគ្រាប់មីនស្គរមកដំលេងធ្វើផ្ទុះដែលហេតុការណ៍នេះកើតឡើងនៅនៅឃុំ​ត្រពាំងប្រីយ៍​ ស្រុកអន្លង់វែង​ ខេត្តឧត្តរមានជ័យ កាលពីព្រឹកថ្ងៃទី​១៧​ ខែមីនា​ ឆ្នាំ២០២៤។

បើតាមមជ្ឈមណ្ឌលសកម្មភាពកម្ចាត់មីនកម្ពុជា(CMAC) មុនពេលកើតហេតុកុមារជនរងគ្រោះទាំង៣បានទៅចម្ការដំឡូងជាមួយម្តាយហើយបានប្រទះឃើញមីនស្គរ ក៏បានរើសវាយកមកវាយដំលេងបណ្តាលឱ្យផ្ទុះស្លាប់កុមារម្នាក់នៅនឹងកន្លែង និង២នាក់រងរបួសធ្ងន់ធ្ងរ។

ភ្លាមៗបន្ទាប់ពីឧបទ្ទវហេតុ កុមារាកុមារីរងគ្រោះត្រូវបានដឹកជញ្ជូនមក មន្ទីរពេទ្យបង្អែកស្រុកអន្លង់វែង។ ដោយសភាពរបួសមានភាពធ្ងន់ធ្ងរ ជនរងគ្រោះត្រូវបានបញ្ជូនមកទទួលការព្យាបាល នៅមន្ទីរពេទ្យកុមារគន្ធបុប្ផានៅភ្នំពេញ។

អាជ្ញាធរមីនអំពាវនាវដល់ប្រជាពលរដ្ឋទាំងអស់​កុំចូលទៅតំបន់ណាដែលមិនដឹងប្រវត្តិច្បាស់​លាស់​ និងត្រូវសាកសួរអាជ្ញាធរមូលដ្ឋានមុនចូលតំបន់នោះ និងសូមកុំប៉ះពាល់នៅពេលឃើញមីន និងគ្រាប់មិនទាន់ផ្ទុះ ហើយត្រូវរាយការណ៍ជាបន្ទាន់ដល់អាជ្ញាធរមានសមត្ថកិច្ច និងប្រតិបត្តិករបោសសម្អាតមីនដែលនៅជិតទីនោះដើម្បីយកគ្រាប់ទាំងនោះទៅកម្ទេចចោល៕